ಶಿವಮೊಗ್ಗ: ಪದ್ಮಶ್ರೀ ಪುರಸ್ಕೃತ ಖ್ಯಾತ ಗಮಕ ಕಲಾವಿದ ಹೊಸಳ್ಳಿ ಹೆಚ್ ಆರ್ ಕೇಶವ ಮೂರ್ತಿ(88) ನಿಧನರಾಗಿದ್ದಾರೆ. ವಯೋ ಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಕೇಶವ ಮೂರ್ತಿ ಇಂದು ಮಧ್ಯಾಹ್ನ ಸ್ವ ಗೃಹದಲ್ಲಿ ನಿಧನರಾಗಿದ್ದಾರೆ.
ಶಿವಮೊಗ್ಗ ಜಿಲ್ಲೆಯ ಹೊಸಳ್ಳಿ ಗ್ರಾಮದವರಾಗಿದ್ದ ಕೇಶವ ಮೂರ್ತಿ ಗಮಕ ಕಲೆಯಿಂದ ರಾಜ್ಯಾದ್ಯಂತ ಪ್ರಸಿದ್ಧಿ ಪಡೆದಿದ್ದರು. 1934 ಪೆಬ್ರುವರಿ 22 ರಂದು ಜನಿಸಿದ ಅವರು ತಂದೆಯಿಂದ ಸಂಗೀತ ಬಳುವಳಿ ಪಡೆದಿದ್ದರು. ತಂದೆ ರಾಮಸ್ವಾಮಿ ಶಾಸ್ತ್ರೀಯ ಹಾಗೂ ಸಂಸ್ಕೃತ ವಿದ್ವಾಂಸರು.
ಕೇಶವ ಮೂರ್ತಿ ಗಮಕ ಕಲೆಗಾಗಿ ಇರುವ ಕುಮಾರವ್ಯಾಸ ಪ್ರಶಸ್ತಿಯನ್ನು ಮೊದಲನೆಯವರಾಗಿ ಪಡೆದಿದ್ದರು. ಗಮಕ ಕೋಗಿಲ, ಗಮಕ ಗಂಧರ್ವ, ಗಮಕ ಗಾನವಾರಿಧಿ ಪ್ರಶಸ್ತಿ ಪಡೆದಿದ್ದರು. ಕರ್ನಾಟಕ ಸಂಗೀತ ನೃತ್ಯ ಅಕಾಡೆಮಿ ತನ್ನ 1994-95 ನೇ ಸಾಲಿನ ‘ಕರ್ನಾಟಕ ಕಲಾತಿಲಕ’ ಬಿರುದನ್ನು ನೀಡಿ ಗೌರವಿಸಿತು.
