ರಾಜ್ಯದ ರಸ್ತೆ ಸಾರಿಗೆ ಸಂಸ್ಥೆ ಬಸ್ಸುಗಳಲ್ಲಿ ಮಹಾರಾಷ್ಟ್ರ ಲಾಂಛನ; ಸ್ಪಷ್ಟನೆ ಕೊಟ್ಟ ಅಧಿಕಾರಿಗಳು

ಗದಗ. ವಾಯುವ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ಸುಗಳಲ್ಲಿ ನೀಡಲಾಗುತ್ತಿದ್ದ ಟಿಕೆಟ್ ಗಳಲ್ಲಿ ಮಹಾರಾಷ್ಟ್ರದ ಲಾಂಛನ ಕಂಡುಬಂದದ್ದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿತ್ತು.

ಗದಗ್ ವಿಭಾಗಕ್ಕೆ ಸೇರಿದ ಬಸ್ಸುಗಳಲ್ಲಿ ನೀಡಲಾಗುತ್ತಿದ್ದ ಟಿಕೆಟ್ ಗಳಲ್ಲಿ ಮಹಾರಾಷ್ಟ್ರ ಲಾಂಛನವಿತ್ತು. ಈ ಕುರಿತು ಅನೇಕ ಪ್ರಯಾಣಿಕರು ಸಾಮಾಜಿಕ ಜಾಲತಾಣಗಳಲ್ಲಿ ಟಿಕೆಟ್ ನೊಂದಿಗೆ ತಮ್ಮ ಅಕ್ರೋಶವನ್ನು ಹೊರಹಾಕಿದ್ದರು, ಆಗಿರುವ ಪ್ರಮಾದವನ್ನು ಸರಿಪಡಿಸಿಕೊಳ್ಳುವಂತೆ ಸಾರಿಗೆ ಸಂಸ್ಥೆಯ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿದ್ದರು.

ಸಾರ್ವಜನಿಕರ ಆಕ್ರೋಶದಿಂದ ಎಚ್ಚೆತ್ತುಕೊಂಡ ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ ಗದಗ್ ವಿಭಾಗದ ಅಧಿಕಾರಿಗಳು, ಮಹಾರಾಷ್ಟ್ರ ಲಾಂಛನ ವಿಚಾರವಾಗಿ ಸ್ಪಷ್ಟನೆ ನೀಡಿದ್ದಾರೆ.

ಗದಗ್ ವಿಭಾಗದ ರೋಣ ಮತ್ತು ಗದಗ್ ಘಟಕದ ಈಟಿಎಂ ಗಳಲ್ಲಿನ ಎರಡು ರೋಲ್ಗಳು ಮಹಾರಾಷ್ಟ್ರ ರಸ್ತೆ ಸಾರಿಗೆ ಸಂಸ್ಥೆಗೆ ಸೇರಿದ್ದಾಗಿವೆ. ಪೊರೆಕೆದಾರರ ಕಣ್ ತಪ್ಪಿನಿಂದ ಮಹಾರಾಷ್ಟ್ರದ ಎರಡು ರೋಲ್ ಗಳು ಗದಗ್ ಘಟಕಕ್ಕೆ ಪೂರೈಕೆಯಾಗಿರುವ ಹಿನ್ನೆಲೆಯಲ್ಲಿ ಈ ಪ್ರಮಾದವಾಗಿದೆ.

ಡಿಪೋದಲ್ಲಿರುವ ಅಧಿಕಾರಿಗಳು ಮತ್ತು ನಿರ್ವಾಹಕರು ಪರಿಶೀಲನೆ ಮಾಡದೆ ಆ ರೋಲ್ ಗಳನ್ನು ಬಳಸಿದ್ದಾರೆ. ರೋಣ ಘಟಕದಲ್ಲಿ 70 ಮತ್ತು ಗದಗ ಘಟಕದಲ್ಲಿ 60 ರೋಲ್ ಗಳು ಹೀಗೆ ವಿತರಣೆಯಾಗಿದೆ. ವಿಷಯ ತಿಳಿಯುತ್ತಿದ್ದಂತೆ ಈಟಿಎಂ ರೋಲ್‌ಗಳನ್ನು ಹಿಂಪಡೆಯಲಾಗಿದೆ. 

ಜೊತೆಗೆ ತಪ್ಪು ಮಾಡಿದ ಅಧಿಕಾರಿಗಳು ಹಾಗೂ ಪೂರೈಕೆ ಮಾಡಿದ ಸಂಸ್ಥೆಯ ಮೇಲು ಕ್ರಮ ಕೈಗೊಳ್ಳುವುದಾಗಿ ಗದಗ್ ವಿಭಾಗಿಯ ನಿಯಂತ್ರಣ ಅಧಿಕಾರಿಗಳು ಪ್ರಕಟಣೆ ಹೊರಡಿಸಿದ್ದಾರೆ.