ಹುಬ್ಬಳ್ಳಿ: ಬೆಂಗಳೂರಿನಿಂದ ಹುಬ್ಬಳ್ಳಿಗೆ ಪ್ರಯಾಣಿಸುತ್ತಿದ್ದ ಇಂಡಿಗೋ ವಿಮಾನವೊಂದರಲ್ಲಿ ಶನಿವಾರ ರಾತ್ರಿ ನಾಟಕೀಯ ಘಟನೆಯೊಂದು ನಡೆದಿದ್ದು, ವಿಮಾನದಲ್ಲಿ ಕುಳಿತಿದ್ದ 70ಕ್ಕೂ ಹೆಚ್ಚು ಪ್ರಯಾಣಿಕರು ಕೆಲ ಕ್ಷಣಗಳ ಕಾಲ ಆತಂಕಕ್ಕೆ ಒಳಗಾಗಿದ್ದರು.
ಹುಬ್ಬಳ್ಳಿ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡಿಂಗ್ ಪ್ರಕ್ರಿಯೆ ಆರಂಭವಾಗುತ್ತಿದ್ದಂತೆಯೇ ಎದುರಾದ ತಾಂತ್ರಿಕ/ಪರಿಸ್ಥಿತಿ ಸಮಸ್ಯೆಯಿಂದಾಗಿ ವಿಮಾನವು ಮತ್ತೆ ಟೇಕ್-ಆಫ್ ಆಗಿ, 15 ನಿಮಿಷಗಳ ಕಾಲ ಹಾರಾಟ ನಡೆಸಿ ಬಳಿಕ ಸುರಕ್ಷಿತವಾಗಿ ಇಳಿದಿದೆ.
ದಿಢೀರ್ ಸದ್ದು, ದಿಢೀರ್ ಟೇಕ್-ಆಫ್!
ಶನಿವಾರ ಸಂಜೆ 6:45ಕ್ಕೆ ಬೆಂಗಳೂರಿನಿಂದ ಹೊರಟ ಇಂಡಿಗೋ ವಿಮಾನ 6ಇ-7162 ನಿಗದಿಯಂತೆ 7:45ರ ಸುಮಾರಿಗೆ ಹುಬ್ಬಳ್ಳಿಯಲ್ಲಿ ಇಳಿಯಬೇಕಿತ್ತು. ವಿಮಾನವು ರನ್‌ವೇಗೆ ಸಮೀಪಿಸಿ, ಪ್ರಯಾಣಿಕರೆಲ್ಲಾ ಇಳಿಯಲು ಸಿದ್ಧವಾಗುತ್ತಿದ್ದಾಗ, ಏಕಾಏಕಿ ದೊಡ್ಡ ಶಬ್ದ ಕೇಳಿಬಂದಿದೆ.
“ವಿಮಾನವು ಇನ್ನೇನು ನೆಲಕ್ಕೆ ತಾಗಲಿದೆ ಎನ್ನುವಾಗಲೇ ದೊಡ್ಡ ಸದ್ದು ಬಂದಿತು. ಅದಾದ ಕ್ಷಣಾರ್ಧದಲ್ಲೇ ವಿಮಾನ ಮತ್ತೆ ಮೇಲೆ ಹಾರಿತು,” ಎಂದು ವಿಮಾನದಲ್ಲಿದ್ದ ಪ್ರಯಾಣಿಕರೊಬ್ಬರು ತಿಳಿಸಿದ್ದಾರೆ.
ಈ ಘಟನೆಯ ಕುರಿತು ವಿಮಾನದ ಸಿಬ್ಬಂದಿ ಒಳಗಿದ್ದ ಪ್ರಯಾಣಿಕರಿಗೆ ಯಾವುದೇ ಮಾಹಿತಿ ನೀಡದ ಕಾರಣ, ಕೆಲಕಾಲ ಗೊಂದಲ ಮತ್ತು ಆತಂಕದ ವಾತಾವರಣ ಸೃಷ್ಟಿಯಾಯಿತು. ವಿಮಾನವು ಮತ್ತೊಮ್ಮೆ ಸುಮಾರು 10 ರಿಂದ 15 ನಿಮಿಷಗಳ ಕಾಲ ಹಾರಾಟ ನಡೆಸಿ, ನಂತರ ರಾತ್ರಿ 8 ಗಂಟೆ ಸುಮಾರಿಗೆ ಸುರಕ್ಷಿತವಾಗಿ ಲ್ಯಾಂಡಿಂಗ್ ಆಗಿದೆ.
ವಿಮಾನದೊಳಗೆ ಪ್ರಯಾಣಿಕರ ನಿಟ್ಟುಸಿರು
ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ಪ್ರಮುಖರಲ್ಲಿ ಹೆಸ್ಕಾಂ ಅಧ್ಯಕ್ಷ ಅಜ್ಜಂಪೀರ ಖಾದ್ರಿ, ವಿಧಾನಪರಿಷತ್ ಸದಸ್ಯ ಬಾದರಲಿ ಹಾಗೂ ನಗರದ ಖ್ಯಾತ ವೈದ್ಯ ಡಾ.ಜಿ.ಬಿ.ಸತ್ತೂರ ಸೇರಿ ಸುಮಾರು 70 ಪ್ರಯಾಣಿಕರಿದ್ದರು.
ಘಟನೆಯ ಕುರಿತು ಮಾತನಾಡಿದ ಡಾ.ಜಿ.ಬಿ. ಸತ್ತೂರ, “ಒಮ್ಮೆಗೆ ಬಂದ ಶಬ್ದಕ್ಕೆ ಕೆಲವರು ಗಾಬರಿಗೊಂಡಿದ್ದರು. ಮತ್ತೆ ಹಾರಾಟ ಆರಂಭಿಸಿದಾಗ ಯಾಕೆ, ಏನಾಯಿತು ಎಂದು ಕೆಲವರು ಆತಂಕಕ್ಕೆ ಒಳಗಾಗಿದ್ದರು. ಸುರಕ್ಷಿತವಾಗಿ ಲ್ಯಾಂಡ್ ಆಗುತ್ತಿದ್ದಂತೆ ಎಲ್ಲರೂ ನಿಟ್ಟುಸಿರು ಬಿಟ್ಟರು,” ಎಂದು ವಿವರಿಸಿದ್ದಾರೆ.
“ವಿಮಾನದಿಂದ ಇಳಿದ ಮೇಲೆ ನಮಗೆಲ್ಲ ಶಬ್ದ ಯಾವುದಕ್ಕೆ ಬಂದಿದೆ ಎಂಬುದು ಗೊತ್ತಾಯಿತು. ಜೋರಾದ ಗಾಳಿ ಬೀಸಿದ್ದರಿಂದ ವಿಮಾನ ಇಳಿಯುವ ಸಂದರ್ಭದಲ್ಲಿ ಜೋರಾಗಿ ಶಬ್ದ ಬಂದಿದೆ ಎಂದು ವಿಮಾನ ನಿಲ್ದಾಣದಲ್ಲಿದ್ದ ಕೆಲವರು ಹೇಳಿದರು. ಏನೇ ಆಗಲಿ, ವಿಮಾನವನ್ನು ಸುರಕ್ಷಿತವಾಗಿ ಇಳಿಸಿದ್ದಕ್ಕೆ ಸಿಬ್ಬಂದಿಗೆ ಥ್ಯಾಂಕ್ಸ್ ಹೇಳಿ ಹೊರಬಂದೇವು.”
-ಡಾ.ಜಿ.ಬಿ.ಸತ್ತೂರ, ಖ್ಯಾತ ವೈದ್ಯರು, ಹುಬ್ಬಳ್ಳಿ.ವಿಮಾನ ನಿಲ್ದಾಣಕ್ಕೆ ಮಾಹಿತಿ ಇಲ್ಲ: ಅಧಿಕಾರಿಗಳು
ಈ ಮಧ್ಯೆ, ಇಂಡಿಗೋ ವಿಮಾನದ ಲ್ಯಾಂಡಿಂಗ್ ವೇಳೆ ಸಮಸ್ಯೆ ಎದುರಾಗಿರುವ ಬಗ್ಗೆ ಹುಬ್ಬಳ್ಳಿ ವಿಮಾನ ನಿಲ್ದಾಣದ ಅಧಿಕಾರಿಗಳು ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ.“ಬೆಂಗಳೂರಿನಿಂದ ಹುಬ್ಬಳ್ಳಿಗೆ ಬಂದಿದ್ದ ಇಂಡಿಗೋ ವಿಮಾನದ ಲ್ಯಾಂಡಿಂಗ್ ಸಂದರ್ಭದಲ್ಲಿ ಸಮಸ್ಯೆ ಆಗಿರುವ ಬಗ್ಗೆ ವಿಮಾನ ನಿಲ್ದಾಣಕ್ಕೆ ಯಾವುದೇ ಮಾಹಿತಿ ಬಂದಿಲ್ಲ,” ಎಂದು ಹುಬ್ಬಳ್ಳಿ ವಿಮಾನ ನಿಲ್ದಾಣದ ಪ್ರಭಾರಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
