ಗದಗ: ಆನ್‌ಲೈನ್ ಟ್ರೇಡಿಂಗ್ ಮೂಲಕ ಭಾರಿ ಲಾಭಾಂಶದ ಆಮಿಷವೊಡ್ಡಿ ವ್ಯಕ್ತಿಯೊಬ್ಬರಿಗೆ ₹40 ಲಕ್ಷಕ್ಕೂ ಅಧಿಕ ಹಣವನ್ನು ವಂಚಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಈ ಸಂಬಂಧ ಗದಗ ಸಿಇಎನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಜಿಲ್ಲೆಯ ಉದ್ಯಮಿಯೊಬ್ಬರು ವಂಚನೆಗೆ ಒಳಗಾಗಿದ್ದು, 2025ರ ಏಪ್ರಿಲ್ 20ರಂದು ಇಶಿತಾ ಪೌಲ್ ಎಂಬುವವರಿಂದ ಕರೆ ಬಂದಿದೆ. ಇಶಿತಾ ಪೌಲ್, ತಾನು ಝೆರೋಡಾ ಟ್ರೇಡಿಂಗ್ ಬ್ರೋಕರೇಜ್‌ನಿಂದ ಮಾತನಾಡುವುದಾಗಿ ಹೇಳಿ, ಒಂದು ವಾರದೊಳಗೆ OTC (ಓವರ್-ದಿ-ಕೌಂಟರ್) ಟ್ರೇಡಿಂಗ್ ಪ್ರಾರಂಭಿಸುವ ಬಗ್ಗೆ ಮಾಹಿತಿ ನೀಡಿದ್ದಾರೆ.
ವಾಟ್ಸಾಪ್ ಮೂಲಕ ಮಾರ್ಕೆಟಿಂಗ್ ಕುರಿತು ಸಂದೇಶಗಳು ಬರುತ್ತಿದ್ದವು. ಒಂದು ವಾರದ ನಂತರ, ಸ್ಟಾಕ್‌ಗಳನ್ನು ಖರೀದಿಸಲು ಮತ್ತು ಮಾರಾಟ ಮಾಡಲು ಆನ್‌ಲೈನ್ ಪ್ಲಾಟ್‌ಫಾರ್ಮ್‌ನ ಲಿಂಕ್ ನೀಡಲಾಗಿದೆ.
ಆ ಲಿಂಕ್ ಮೂಲಕ ಉದ್ಯಮಿ ಒಟ್ಟು ₹40,04,000 ಹಣವನ್ನು ಹೂಡಿಕೆ ಮಾಡಿದ್ದಾರೆ. ಆರಂಭದಲ್ಲಿ, ಅವರ ವಿಶ್ವಾಸ ಗಳಿಸಲು ₹11,000 ಹಿಂಪಡೆಯಲು ಅವಕಾಶ ನೀಡಲಾಗಿದೆ. ಅವರ ಟ್ರೇಡಿಂಗ್ ಖಾತೆಯಲ್ಲಿ ₹1,82,16,474 ಲಾಭಾಂಶ ತೋರಿಸಲಾಗಿದ್ದರೂ, ಈ ಹಣವನ್ನು ಹಿಂಪಡೆಯಲು ಪ್ರಯತ್ನಿಸಿದಾಗ, ಲಾಭಾಂಶದ 20% ಹಣವನ್ನು ಠೇವಣಿ ಇಡುವಂತೆ ಕೇಳಲಾಗಿದೆ.
ಹಣವನ್ನು ಠೇವಣಿ ಇಟ್ಟ ನಂತರವೂ, ಉದ್ಯಮಿ ಹೂಡಿಕೆ ಮಾಡಿದ ₹40,04,000 ಹಣವನ್ನು ಹಿಂದಿರುಗಿಸದೆ ಮೋಸ ಮಾಡಲಾಗಿದೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಈ ಘಟನೆ 2025ರ ಏಪ್ರಿಲ್ 20 ರಿಂದ ಮೇ 27ರ ಅವಧಿಯಲ್ಲಿ ನಡೆದಿದ್ದು, ಪೊಲೀಸರು ತನಿಖೆ ನಡೆಸಿದ್ದಾರೆ.
