ಮುಂಬೈ: ಮಹಾರಾಷ್ಟ್ರ ಸಿಎಂ ಏಕನಾಥ್ ಶಿಂಧೆ ಹಾಗೂ ಮಾಜಿ ಸಿಎಂ ಉದ್ದವ್ ಠಾಕ್ರೆ ಮಧ್ಯೆ ನಡೆಯುತ್ತಿದ್ದ ‘ಚಿಹ್ನೆ’ ಸಮರಕ್ಕೆ ಚುನಾವಣಾ ಆಯೋಗ ಇತಿಶ್ರೀ ಹಾಡಿದೆ.
ಸಿಎಂ ಏಕನಾಥ್ ಶಿಂಧೆ ಬಣ ನಿಜವಾದ ಶಿವಸೇನೆ ಎಂದು ಹೇಳಿದ್ದು, ಬಿಲ್ಲು ಬಾಣದ ಚಿಹ್ನೆಯನ್ನು ಅವರಿಗೆ ನೀಡಿದೆ. ಬಿಜೆಪಿ ಜತೆಗೂಡಿ ಮಹಾರಾಷ್ಟ್ರದಲ್ಲಿ ಸರ್ಕಾರ ರಚಿಸಿರುವ ಏಕನಾಥ್ ಶಿಂಧೆ ಬಣಕ್ಕೆ ಬಲ ಸಿಕ್ಕಂತಾಯಿತು.
ಉದ್ಧವ್‌ ಠಾಕ್ರೆ ನೇತೃತ್ವದ ಶಿವಸೇನೆಯ ಮತ್ತೊಂದು ಬಣಕ್ಕೆ ಹಿನ್ನಡೆ ಉಂಟಾಗಿದೆ. ಮಾಜಿ ಸಿಎಂ ಠಾಕ್ರೆ ಚುನಾವಣಾ ಆಯೋಗದ ನಿರ್ಧಾರ ವಿರುದ್ಧ ಕಿಡಿಕಾರಿದ್ದಾರೆ.
ಮಹಾ ವಿಕಾಸ ಅಘಾಡಿ ಮೈತ್ರಿಯಿಂದ ಬಂಡಾಯವೆದ್ದಿದ್ದ ಶಿಂಧೆ, 40ಕ್ಕೂ ಹೆಚ್ಚು ಶಿವಸೇನೆಯ ಶಾಸಕರನ್ನು ಸೆಳೆದು ಮತ್ತೊಂದು ಬಣ ರಚಿಸಿ ಬಿಜೆಪಿ ಜೊತೆಗೂಡಿ ಸರ್ಕಾರ ರಚಿಸಿತ್ತು.
ಆನಂತರ ಶಿವಸೇನೆ ಚಿಹ್ನೆಗಾಗಿ ಎರಡು ಬಣಗಳು ಚುನಾವಣಾ ಆಯೋಗದ ಮೊರೆ ಹೋಗಿದ್ದವು. ಚುನಾವಣಾ ಆಯೋಗವು ಕಳೆದ ಉಪ ಚುನಾವಣೆಯಲ್ಲಿ ಎರಡು ಬಣಗಳಿಗೆ ಬೇರೆ ಚಿಹ್ನೆ ಹಾಗೂ ಹೆಸರು ನೀಡಿತ್ತು.
