ಬಾಗಲಕೋಟೆ: ಮಕ್ಕಳು ಗೊತ್ತಿಲ್ಲದೆ ನಾಣ್ಯ ನುಂಗುವುದು ಸಹಜ. ಆದರೆ ವಯಸ್ಕರು ನಾಣ್ಯ ನುಂಗುವುದು ತೀರಾ ವಿರಳ. ಆದರೆ ಇಲ್ಲೊಬ್ಬ ವ್ಯಕ್ತಿ ಬರೊಬ್ಬರಿ 182 ನಾಣ್ಯಗಳನ್ನು ನುಂಗಿದ್ದ. ವೈದ್ಯರು ಶಸ್ತ್ರಚಿಕಿತ್ಸೆ ನಡೆಸಿ ನಾಣ್ಯಗಳನ್ನು ಹೊರತೆಗಿದ್ದಾರೆ. ಒಟ್ಟು 182 ನಾಣ್ಯಗಳ ಮೊತ್ತ ಎಷ್ಟು ಎನ್ನುವುದು ಲೆಕ್ಕಹಾಕಬೇಕಿದೆ.
ಇಂಥದ್ದೊಂದು ಅಪರೂಪದ ವಿದ್ಯಮಾನ ನಡೆದಿರುವುದು ಬಾಗಲಕೋಟೆ ನಗರದಲ್ಲಿ. ಇಲ್ಲಿನ ಬಿವಿವಿ ಸಂಘದ ಎಸ್. ನಿಜಲಿಂಗಪ್ಪ ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಹಾನಗಲ್ ಶ್ರೀ ಕುಮಾರೇಶ್ವರ ಆಸ್ಪತ್ರೆಯ ಶಸ್ತ್ರಚಿಕಿತ್ಸಾ ವಿಭಾಗದ ತಜ್ಞ ವೈದ್ಯರ ತಂಡ ಈ ಚಿಕಿತ್ಸೆ ನಡೆಸಿ, ವ್ಯಕ್ತಿಯ ಉದರದಲ್ಲಿದ್ದ 182 ನಾಣ್ಯಗಳನ್ನು ಹೊರತೆಗೆದಿದ್ದಾರೆ.
ಮೂಲತಃ ರಾಯಚೂರು ಜಿಲ್ಲೆಯ ಲಿಂಗಸಗೂರ ತಾಲೂಕಿನ ದ್ಯಾಮಪ್ಪ ಹರಿಜನ ಎನ್ನುವ 58 ವರ್ಷದ ವ್ಯಕ್ತಿ ನಾಣ್ಯಗಳನ್ನು ನುಂಗಿದ್ದ. ಯಾವ ಕಾರಣಕ್ಕೆ ನುಂಗಿದ್ದ ಎನ್ನುವುದು ಸ್ಪಷ್ಟವಾಗಿಲ್ಲ. ಆದರೆ ಕುಟುಂಬದ ಸದಸ್ಯರು ನಾಣ್ಯ ನುಂಗಿದ್ದನ್ನು ಗಮನಿಸಿ ಆತನನ್ನು ಆಸ್ಪತ್ರೆಗೆ ಕರೆತಂದು ದಾಖಲಿಸಿದ್ದರು.
ಆಸ್ಪತ್ರೆಯ ವೈದ್ಯರು ಎಕ್ಷರೆ ಮಾಡಿ ಪರೀಕ್ಷಿಸಿದಾಗ ಒಂದೆರಡಲ್ಲ ನೂರಾರು ನಾಣ್ಯಗಳನ್ನು ನುಂಗಿರುವುದು ಕಂಡುಬಂತು. ಕುಟುಂಬದವರ ಒಪ್ಪಿಗೆ ಪಡೆದು ಎಂಡೋಸ್ಕೋಪಿ ಮೂಲಕ ನಾಣ್ಯಗಳನ್ನು ಹೊರತೆಗೆದಿದ್ದಾರೆ. ಒಟ್ಟಾರೆ ನಾಣ್ಯದ ಮೊತ್ತ ಗೊತ್ತಾಗಿಲ್ಲ. ಆದರೆ ತೂಕ ಮಾತ್ರ ಒಂದೂವರೆ ಕೆಜಿಯಷ್ಟು ನಾಣ್ಯಗಳನ್ನು ತೆಗೆಯಲಾಗಿದೆ.
ತಜ್ಞ ವೈದ್ಯ ಡಾ.ಈಶ್ವರ ಕಲಬುರ್ಗಿ ಮತ್ತು ಡಾ.ಪ್ರಕಾಶ ಕಟ್ಟಿಮನಿ, ಅರೆವಳಿಕೆ ತ ವೈದ್ಯರೊಂದಿಗೆ ಅರವಳಿಕೆ ತಜ್ಞರಾದ ಡಾ.ಅರ್ಚನಾ ಮತ್ತು ಡಾ.ರೂಪಾ ಹುಲಕುಂದೆ ನೇತೃತ್ವದ ತಂಡ ಶಸ್ತ್ರಚಿಕಿತ್ಸೆ ನಡೆಸುವಲ್ಲಿ ಯಶಸ್ವಿಯಾಗಿದೆ.
