ನವದೆಹಲಿ : ಭೀಕರ ಭೂಕಂಪಕ್ಕೆ ತುತ್ತಾಗಿರುವ ಟರ್ಕಿ ಹಾಗೂ ಸಿರಿಯಾ ದೇಶಗಳಿಗೆ ಭಾರತದ ನೆರವಿನ ಹಸ್ತ ಮುಂದುವರೆದಿದೆ. ಈಗಾಗಲೇ ಟರ್ಕಿಗೆ ದೇಶದ ನಾಲ್ಕು ಸಿ-17 ಮಿಲಿಟರಿ ವಿಮಾನಗಳ ಮೂಲಕ ರಕ್ಷಣಾ ಮತ್ತು ಪರಿಹಾರ ಸಾಮಗ್ರಿಗಳನ್ನು ಕಳುಹಿಸಿಕೊಡಲಾಗಿದೆ.
ಈಗ ದೇಶದಿಂದ ಮತ್ತೊಂದು ಸಿ-17 ಫ್ಲೈಟ್ ರವಾನೆಯಾಗಲಿದೆ ಎಂದು ಹಿರಿಯ ಅಧಿಕಾರಿ ಸಂಜಯ್ ವರ್ಮಾ ತಿಳಿಸಿದ್ದಾರೆ.
ಇದರೊಂದಿಗೆ ಸಾವಿರಾರು ಜನರು ಸಾವನ್ನಪ್ಪಿರುವ ಸಿರಿಯಾ ದೇಶಕ್ಕೂ ಭಾರತ ಸಹಾಯಹಸ್ತ ಚಾಚಿದೆ. ಸಿ-130 ವಿಮಾನದ ಮೂಲಕ ರಕ್ಷಣಾ ಕಾರ್ಯಾಚರಣೆ ತಂಡ ಮತ್ತು ಸಾಮಗ್ರಿಗಳನ್ನು ಸಿರಿಯಾಗೆ ಭಾರತ ತಲುಪಿಸಿದೆ.
ಕೆಲ ದಿನಗಳ ಹಿಂದೆ ಟರ್ಕಿ ದೇಶಕ್ಕೆ ಭಾರತ ನೆರವು ಘೋಷಿಸಿದಾಗ ಆ ದೇಶದ ರಾಯಭಾರಿ ಭಾವುಕಗೊಂಡು ಭಾರತವನ್ನು ಪ್ರಶಂಸಿಸಿದ್ದರು. ಭಾರತವನ್ನು ದೋಸ್ತ್ ಎಂದು ಅವರು ಕರೆದಿದ್ದರು. ಆಪತ್ಕಾಲದಲ್ಲಿ ಆಗುವವನೇ ನಿಜವಾದ ಗೆಳೆಯ ಎಂದು ಅವರು ಹೇಳುವ ಮೂಲಕ ಭಾರತದ ಗುಣಗಾನ ಮಾಡಿದ್ದರು.
ಟರ್ಕಿಯಲ್ಲಿ ಭೂಕಂಪಪೀಡಿತ ಪ್ರದೇಶಗಳಲ್ಲಿ ಭಾರತದ ಎನ್ಡಿಆರ್ಎಫ್ ತಜ್ಞರು ಅಖಾಡಕ್ಕಿಳಿದಿದ್ದಾರೆ. ಎನ್ಡಿಆರ್ಎಫ್ನ 101 ಮಂದಿಯ ಎರಡು ತಂಡಗಳು ಕೆಲಸ ಮಾಡುತ್ತಿವೆ. ಅಲ್ಲದೇ, ಇನ್ನೂ 51 ಜನರು ಟರ್ಕಿಗೆ ತೆರಳಲಿದ್ದಾರೆ.
ಟರ್ಕಿ ಮತ್ತು ಸಿರಿಯಾ ದೇಶಗಳಲ್ಲಿ ಸಂಭವಿಸಿರುವ ಭೂಕಂಪಗಳಲ್ಲಿ 16 ಸಾವಿರಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ ಎನ್ನಲಾಗಿದೆ. ಒಟ್ಟು ನಾಲ್ಕು ಬಾರಿ ದೊಡ್ಡ ಕಂಪನಗಳಾಗಿವೆ. ಇವತ್ತೂ ಕೂಡ ಭೂಮಿ ಸಣ್ಣದಾಗಿ ಕಂಪಿಸಿರುವುದು ತಿಳಿದುಬಂದಿದೆ.
10 ಸಾವಿರಕ್ಕೂ ಹೆಚ್ಚು ಕಟ್ಟಡಗಳು ನೆಲಸಮಗೊಂಡಿವೆ. 1939ರ ನಂತರ ಟರ್ಕಿಯಲ್ಲಿ ಸಂಭವಿಸಿದ ಅತಿ ಭೀಕರ ಭೂಕಂಪ ಇದು ಎಂದು ಬಣ್ಣಿಸಲಾಗುತ್ತಿದೆ.
