ಕೋಲಾರ: ಜೆಡಿಎಸ್ ಶಾಸಕ ಕೆ. ಶ್ರೀನಿವಾಸಗೌಡ ಅವರು ಸಿದ್ದರಾಮಯ್ಯ ಬೆಂಬಲಿಸಿ ಕಾರ್ಯಕರ್ತರೊಬ್ಬರ ಜೊತೆ ಮಾತಾಡಿರುವ ಆಡಿಯೋವೊಂದು ಸಾಕಷ್ಟು ವೈರಲ್ ಆಗಿದೆ. ಕೋಲಾರ ಕ್ಷೇತ್ರದ ಶಾಸಕನಾಗಲು 17 ಕೋಟಿ ರೂ. ಖರ್ಚಾಗಿದೆ ಎನ್ನುವ ಮೂಲಕ ಭಾರೀ ವಿವಾದಕ್ಕೆ ಕಾರಣವಾಗಿದ್ದಾರೆ.
ಕಾರ್ಯಕರ್ತನ ಜೊತೆ ಮಾತಾಡಿರುವ ಆಡಿಯೋ ಸಂಭಾಷಣೆಯಲ್ಲಿ, ಕೋಲಾರ ಕ್ಷೇತ್ರದ ಶಾಸಕನಾಗಲು 17 ಕೋಟಿ ರೂ. ಸಾಲ ಮಾಡಿದ್ದೆನೆ. ಸಿದ್ದರಾಮಯ್ಯ ಮುಖ್ಯಮಂತ್ರಿಯಾದರೆ ನಾನು ಮಂತ್ರಿಯಾಗುತ್ತೆನೆ. ಸಿದ್ದರಾಮಯ್ಯ ಗೆದ್ದರೆ ಕೋಲಾರ ಕ್ಷೇತ್ರದ ಜವಾಬ್ದಾರಿ ನನ್ನದೆ ಆಗಿರುತ್ತದೆ. ಈ ಚುನಾವಣೆಯಲ್ಲಿ ನಾನೇ ಅಭ್ಯರ್ಥಿ ಎಂದು ತಿಳಿದು ಸಿದ್ದರಾಮಯ್ಯಗೆ ಮತ ಹಾಕಿ ಎಂದು ಜೆಡಿಎಸ್ ಶಾಸಕರು ಮಾತಾಡಿರುವುದು ಸದ್ಯ ಚರ್ಚೆಗೆ ಕಾರಣವಾಗಿದೆ.
ಸಿದ್ದರಾಮಯ್ಯ ಕೋಲಾರ ಕ್ಷೇತ್ರದಿಂದ ಸ್ಪರ್ಧಿಸುವ ನಿರ್ಣಯ ತೆಗೆದುಕೊಂಡ ನಂತರ ನಡೆದ ಸಂಭಾಷಣೆ ಇದಾಗಿದ್ದು, ಮಂತ್ರಿಗಿರಿ ಆಸೆಗೆ ಶ್ರೀನಿವಾಸಗೌಡ ತಮ್ಮ ಕ್ಷೇತ್ರವನ್ನು ಮಾತೃ ಪಕ್ಷವನ್ನು ಬಿಟ್ಟುಕೊಟ್ಟಿದ್ದಾರೆ. ಮಂತ್ರಿಗಿರಿಗಾಗಿ ಕ್ಷೇತ್ರದಿಂದ ದೂರ ಉಳಿದಿರುವುದು ಕಾರ್ಯಕರ್ತರಿಗೆ ಅಸಮಾಧಾನ ಉಂಟಾಗಿದೆ.
