ಧಾರವಾಡ: ಅಪಘಾತಕ್ಕೀಡಾದ ಲಾರಿ ದುರಸ್ತಿಗೆ ವಿಮೆ ಹಣ ನೀಡದ ಕಂಪನಿಗೆ ಧಾರವಾಡ ಜಿಲ್ಲಾ ಗ್ರಾಹಕರ ಆಯೋಗ 3.15 ಲಕ್ಷ ರೂ. ದಂಡ, 50 ಸಾವಿರ ರೂ. ಪರಿಹಾರ ಮತ್ತು 10 ಸಾವಿರ ರೂ. ಖರ್ಚು ವೆಚ್ಚಗಳನ್ನು ಭರಿಸುವಂತೆ ಆದೇಶ ನೀಡಿದೆ.
ಏನಿದು ಪ್ರಕರಣ? 2021 ಮಾರ್ಚ್ 24 ರಂದು ತರಿಕೇರಿ ತಾಲೂಕಿನ ಅಜ್ಜಂಪುರದ ವಾಸಿ ಫಯಾಜ ರೆಹಮಾನ ಅವರು ಒಣ ಮೆನಸಿನಕಾಯಿ ತುಂಬಿದ ಲಾರಿಯನ್ನು ಹೊರಟಿದ್ದಾಗ, ಹಾವೇರಿ ಜಿಲ್ಲೆಯ ಹಲಗೇರಿ ಠಾಣಾ ವ್ಯಾಪ್ತಿಯಲ್ಲಿ ಅಪಘಾತಕ್ಕೀಡಾಗಿತ್ತು.
ಆ ಲಾರಿ ಜಖಂಗೊಂಡು ಅದರ ರಿಪೇರಿಗಾಗಿ 4 ಲಕ್ಷ ರೂಪಾಯಿ ದೂರುದಾರ ಖರ್ಚು ಮಾಡಿದ್ದರು. ಆ ಲಾರಿ ಯುನಿವರ್ಸಲ್ ಸೋಂಪೊ ವಿಮಾ ಕಂಪನಿಯಿಂದ ವಿಮೆಗೆ ಒಳಪಟ್ಟಿತ್ತು. ಆ ಲಾರಿಯನ್ನು ಶಿವಮೊಗ್ಗದ ಅಧಿಕೃತ ಸರ್ವಿಸ್ ಸ್ಟೇಷನ್‍ನಲ್ಲಿ ರಿಪೇರಿ ಮಾಡಿಸಲಾಗಿದ್ದು. ಅದರ ರಿಪೇರಿ ಖರ್ಚು ವೆಚ್ಚ 4 ಲಕ್ಷ ರೂಪಾಯಿ ಕೊಡುವಂತೆ ವಿಮಾ ಕಂಪನಿಗೆ ದೂರುದಾರ ಬೇಡಿಕೆ ಸಲ್ಲಿಸಿದ್ದರು.
ಆದರೆ ಅಪಘಾತ ಸಮಯದಲ್ಲಿ ಲಾರಿಯಲ್ಲಿ ಇಬ್ಬರೂ ಪ್ರಯಾಣಿಕರು ಇದ್ದ ಕಾರಣ ವಿಮಾ ಪಾಲಸಿಯ ಷರತ್ತನ್ನು ಲಾರಿ ಮಾಲೀಕ ಉಲ್ಲಂಘಿಸಿದ್ದಾರೆ ಎನ್ನುವ ಕಾರಣದ ಮೇಲೆ ವಿಮಾ ಹಣ ನೀಡಲು ಕಂಪನಿ ನಿರಾಕರಿಸಿತ್ತು.
ಆ ರೀತಿ ನಿರಾಕರಣೆ ಮಾಡುವುದು ಸೇವಾ ನ್ಯೂನ್ಯತೆ ಆಗುತ್ತದೆ ಮತ್ತು ಅದರಿಂದ ತನಗೆ ತೊಂದರೆ ಆಗಿದೆ ಅಂತಾ ವಿಮಾ ಕಂಪನಿಯ ಮೇಲೆ ಕ್ರಮ ಕೈಗೊಂಡು ಪರಿಹಾರದ ಹಣ ಕೊಡಿಸುವಂತೆ ದೂರುದಾರ ಜಿಲ್ಲಾ ಗ್ರಾಹಕರ ಆಯೋಗಕ್ಕೆ ದೂರು ಸಲ್ಲಿಸಿದ್ದರು.
ದೂರಿನ ಬಗ್ಗೆ ಕೂಲಂಕುಷವಾಗಿ ವಿಚಾರಣೆ ನಡೆಸಿದ ಆಯೋಗದ ಅಧ್ಯಕ್ಷರಾದ ಈಶಪ್ಪ ಭೂತೆ, ವಿಶಾಲಾಕ್ಷಿ ಬೋಳಶೆಟ್ಟಿ ಹಾಗೂ ಪಿ.ಸಿ. ಹಿರೇಮಠ ಸದಸ್ಯರು, ದೂರುದಾರರ ಲಾರಿ ವಿಮೆ ಸೌಲಭ್ಯಕ್ಕೆ ಒಳಪಟ್ಟಿದ್ದರೂ ಮತ್ತು ವಿಮಾ ಪಾಲಸಿ ಚಾಲ್ತಿಯಿದ್ದಾಗ ಆ ಲಾರಿಯ ರಿಪೇರಿಗೆ ತಗುಲಿದ ಎಲ್ಲ ಖರ್ಚು ವೆಚ್ಚ ಭರಿಸುವುದು ವಿಮಾ ಕಂಪನಿಯ ಕರ್ತವ್ಯವಾಗಿದೆ ಅಂತಾ ಆಯೋಗ ಅಭಿಪ್ರಾಯಪಟ್ಟು ತೀರ್ಪು ನೀಡಿದೆ.
ಈ ಬಗ್ಗೆ ಯುನಿವರ್ಸಲ್ ಸೋಂಪೋ ಕಂಪನಿಯವರು ದೂರುದಾರರಿಗೆ 3,15,942 ರೂ. ವಿಮಾ ಹಣ ನೀಡುವಂತೆ ಆದೇಶಿಸಿದೆ. ಜೊತೆಗೆ ದೂರುದಾರರಿಗೆ ಆಗಿರುವ ಅನಾನುಕೂಲ ಮತ್ತು ಮಾನಸಿಕ ಹಿಂಸೆಗೆ ರೂ.50,000/- ಪರಿಹಾರ ಮತ್ತು ರೂ.10,000/- ಗಳನ್ನು ರೂಪಾಯಿ ಪ್ರಕರಣದ ಖರ್ಚು ವೆಚ್ಚ ಒಂದು ತಿಂಗಳ ಒಳಗಾಗಿ ಕೊಡುವಂತೆ ಆಯೋಗ ತೀರ್ಪು ನೀಡಿದೆ.
