ಹುಬ್ಬಳ್ಳಿ; ನೈಋತ್ಯ ರೈಲ್ವೆ ವಲಯದ ಐದು ಪ್ರಮುಖ ರೈಲು ನಿಲ್ದಾಣಗಳು ‘ಅಮೃತ್ ಭಾರತ್ ರೈಲು ನಿಲ್ದಾಣ ಯೋಜನೆ’ ಅಡಿಯಲ್ಲಿ ನವೀಕರಣಗೊಂಡು ಮೇ 22 ರಂದು ಉದ್ಘಾಟನೆಗೆ ಸಜ್ಜಾಗಿವೆ.
ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ವರ್ಚುವಲ್ ಕಾರ್ಯಕ್ರಮದ ಮೂಲಕ ಈ ನಿಲ್ದಾಣಗಳನ್ನು ದೇಶಕ್ಕೆ ಸಮರ್ಪಿಸಲಿದ್ದಾರೆ.
ವಿಶ್ವದರ್ಜೆಯ ಸೌಲಭ್ಯಗಳೊಂದಿಗೆ ಆಧುನೀಕರಣ
ನವೀಕೃತಗೊಳ್ಳಲಿರುವ ನಿಲ್ದಾಣಗಳೆಂದರೆ ಗದಗ, ಧಾರವಾಡ, ಬಾಗಲಕೋಟೆ, ಗೋಕಾಕ ರಸ್ತೆ ಮತ್ತು ಮುನಿರಾಬಾದ್ (ಕೊಪ್ಪಳ ಜಿಲ್ಲೆ).
ಅಮೃತ್ ಭಾರತ್ ರೈಲು ನಿಲ್ದಾಣ ಯೋಜನೆಯು ದೇಶಾದ್ಯಂತ 1275 ನಿಲ್ದಾಣಗಳನ್ನು ಮೇಲ್ದರ್ಜೆಗೇರಿಸುವ ಗುರಿಯನ್ನು ಹೊಂದಿದೆ. ಮೊದಲ ಹಂತದಲ್ಲಿ, ನೈಋತ್ಯ ರೈಲ್ವೆಯ ಈ ಐದು ನಿಲ್ದಾಣಗಳು ಸೇರಿದಂತೆ ಒಟ್ಟು 103 ನಿಲ್ದಾಣಗಳನ್ನು ಲೋಕಾರ್ಪಣೆ ಮಾಡಲಾಗುತ್ತಿದೆ.
ಪ್ರಯಾಣಿಕರಿಗೆ ಸುಧಾರಿತ ಸೌಕರ್ಯಗಳು
ಈ ನವೀಕೃತ ನಿಲ್ದಾಣಗಳು ಪ್ರಯಾಣಿಕರ ಅನುಕೂಲಕ್ಕಾಗಿ ಹಲವು ಸುಧಾರಿತ ಸೌಲಭ್ಯಗಳನ್ನು ಒಳಗೊಂಡಿವೆ:
- ಏಕರೂಪದ ಮತ್ತು ಸುಸಜ್ಜಿತ ಪ್ರವೇಶ ದ್ವಾರಗಳು
- 12 ಮೀಟರ್ ಅಗಲದ ಪಾದಚಾರಿ ಮೇಲ್ಸೇತುವೆಗಳು
- ಲಿಫ್ಟ್ಗಳು ಮತ್ತು ಎಸ್ಕಲೇಟರ್ಗಳು
- ಗರಿಷ್ಠ 5, ಕನಿಷ್ಠ 3 ಟಿಕೆಟ್ ಕೌಂಟರ್ಗಳು
- ಮುಂಗಡ ಕಾಯ್ದಿರಿಸುವ ಕೌಂಟರ್
- ಸ್ಥಳೀಯ ಉತ್ಪನ್ನಗಳ ಮಾರಾಟ ಮಳಿಗೆಗಳು
- ಆಧುನಿಕ ಮತ್ತು ಸುಸಜ್ಜಿತ ಶೌಚಾಲಯಗಳು (ವಿಶೇಷ ಚೇತನರಿಗೆ ಪ್ರತ್ಯೇಕ ಸೌಲಭ್ಯ)
- ಪುರುಷರು ಮತ್ತು ಮಹಿಳೆಯರಿಗೆ ಪ್ರತ್ಯೇಕ ಕಾಯುವ ಕೊಠಡಿಗಳು
- ಶುದ್ಧ ಕುಡಿಯುವ ನೀರು ಮತ್ತು ಉಪಹಾರ ಗೃಹಗಳು
- ಸೌರ ವಿದ್ಯುತ್ ಘಟಕಗಳು
- ಮಳೆ ನೀರು ಕೊಯ್ಲು ವ್ಯವಸ್ಥೆ
- ತ್ಯಾಜ್ಯ ನಿರ್ವಹಣಾ ವ್ಯವಸ್ಥೆ
