ಬೆಂಗಳೂರು: ಭಾರತ ಕ್ರಿಕೆಟ್ ತಂಡದ ಆಟಗಾರ್ತಿ ಸ್ಮೃತಿ ಮಂಧನಾ ಅವರನ್ನು ವಿಮೆನ್ಸ್‌ ಪ್ರೀಮಿಯರ್‌ ಲೀಗ್‌ ಹರಾಜಿನಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡ ಖರೀದಿಸಿದೆ.
ಆರ್ ಸಿಬಿ ಸ್ಮೃತಿ ಅವರನ್ನು ಖರೀದಿಸಿದ ನಂತರ, ಅವರ ಅಭಿಮಾನಿಗಳು ಜಾಲತಾಣ ಫೇಸ್ ಬುಕ್ ನಲ್ಲಿ ಸಂತಸ ಹಂಚಿಕೊಂಡಿದ್ದಾರೆ.
ಸ್ಮೃತಿ ದುಬಾರಿ ಮೊತ್ತ ಪಡೆದ ಆಟಗಾರ್ತಿಯಾಗಿ, ₹ 3.4 ಕೋಟಿಗೆ ಬೆಂಗಳೂರು ತಂಡ ಖರೀದಿಸಿದೆ.
ಸ್ಮೃತಿಯನ್ನು ಆರ್‌ಸಿಬಿ ತಂಡವು ಭಾರಿ ಮೊತ್ತಕ್ಕೆ ಬಿಡ್‌ ಮಾಡಲು ಹಲವು ಕಾರಣಗಳಿವೆ. ಇದಕ್ಕೆ ಮೊದಲನೇ ಕಾರಣ ಅವರ ಸ್ಫೋಟಕ ಆಟ. ಅಗ್ರ ಕ್ರಮಾಂಕದಲ್ಲಿ ನಿರ್ಭೀತಿಯಿಂದ ಬ್ಯಾಟ್‌ ಬೀಸುವ ಸ್ಮೃತಿ, ಟಿ-20 ಮಾದರಿಯಲ್ಲೂ ಸುದೀರ್ಘ ಇನ್ನಿಂಗ್ಸ್‌ ಕಟ್ಟುವ ಸಾಮರ್ಥ್ಯ ಹೊಂದಿದ್ದಾರೆ.
ಭಾರತ ತಂಡದಲ್ಲಿ ಹಲವು ವರ್ಷಗಳಿಂದ ಆಡಿರುವ ಅನುಭವ ಹೊಂದಿದ್ದಾರೆ. ಇದುವರೆಗೂ ಸ್ಮೃತಿ ಭಾರತದ ಪರ ಆಡಿರುವ 112 ಟಿ-20 ಪಂದ್ಯಗಳಲ್ಲಿ 27.32 ಸರಾಸರಿಯಲ್ಲಿ ಬ್ಯಾಟ್‌ ಬೀಸಿ 2,651 ರನ್ ಗಳಿಸಿದ್ದಾರೆ.
