ಚಿತ್ರದುರ್ಗ: ಕರ್ನಾಟಕ ವಿಧಾನಸಭಾ ಚುನಾವಣಾ ಸಮೀಪಿಸುತ್ತಿದ್ದಂತೆ ಆಡಿಯೋ ಬಿಡುಗಡೆ ಜೋರಾಗಿದೆ. ಈಗ ಚಿತ್ರದುರ್ಗ ಬಿಜೆಪಿ ಶಾಸಕ ಜಿ ಎಚ್ ತಿಪ್ಪಾರೆಡ್ಡಿ ವಿರುದ್ಧ ಕಮಿಷನ್ ನೀಡುವ ಕುರಿತು ಮಾತನಾಡಿರುವ ಆಡಿಯೋವನ್ನು ಮಂಜುನಾಥ ಎಂಬಾತ ಬಿಡುಗಡೆ ಮಾಡಿದ್ದಾನೆ.
ಶಾಸಕ ತಿಪ್ಪಾರೆಡ್ಡಿ ಭ್ರಷ್ಟಾಚಾರ ಮಾಡಿರುವ ಬಗ್ಗೆ ಲೋಕಾಯುಕ್ತಕ್ಕೆ ಅಫಿಡೆವಿಟ್ ಸಲ್ಲಿಸಿದ್ದೇವೆ. ತಿಪ್ಪಾರೆಡ್ಡಿ ಭ್ರಷ್ಟಾಚಾರ ಮಾಡಿರುವ ಬಗ್ಗೆ ಆಡಿಯೋ ಇದೆ. ಚಿತ್ರದುರ್ಗದ 700 -800 ಕೋಟಿ ಕಾಮಗಾರಿ ಆಗಿದೆ. ಪಿಡಬ್ಲ್ಯೂಡಿ ಕೆಲಸ 15%, ಬಿಲ್ಡಿಂಗ್ 10 ಪರ್ಸೆಂಟ್ ತೆಗೆದುಕೊಳ್ಳುತ್ತಿದ್ದಾರೆ. ನನ್ನ ಹತ್ತಿರ ಬಿಲ್ಡಿಂಗ್ ಕೆಲಸ ಮಾಡಿದ್ದಾಗ 1 ಕೋಟಿಗೆ 10 ಪರ್ಸೆಂಟ್ ಪಡೆದಿದ್ದಾರೆ ಎಂದು ಮಂಜುನಾಥ ಆರೋಪಿಸಿದ್ದಾರೆ.
ತಿಪ್ಪಾರೆಡ್ಡಿ ವಿರುದ್ಧದ ಕಮಿಷನ್ ಆರೋಪದ ಬಗ್ಗೆ ಸಚಿವ ಸುಧಾಕರ್ ಪ್ರತಿಕ್ರಿಯಿಸಿದ್ದು, ಚುನಾವಣೆ ಹೊಸ್ತಿಲಲ್ಲಿ ಇದು ಸಾಮಾನ್ಯ. ಆರೋಪಗಳಿಗೆ ಸರ್ಕಾರ ಸಮರ್ಥವಾಗಿ ಉತ್ತರ ಕೊಡುತ್ತದೆ ಎಂದಿದ್ದಾರೆ.
