ಗದಗ-ಬೆಟಗೇರಿ: ತಾನು ಪ್ರೀತಿಸಿ ವಿವಾಹವಾದ ಯುವತಿ ಮತ್ತು ಆಕೆಯ ಕುಟುಂಬ ಮತಾಂತರಕ್ಕೆ ಪ್ರಯತ್ನಿಸಿ, ಮಾನಸಿಕ ಹಿಂಸೆ ನೀಡಿದ ಆರೋಪಿಸಿ ಆರೋಪಿಸಿ ಯುವಕನೊಬ್ಬ ಪೊಲೀಸ್ ಠಾಣೆ ಮೇಟ್ಟಿಲೇರಿದ್ದಾನೆ.
ಬೆಟಗೇರಿ ಗಾಂಧಿ ನಗರ ಸೆಟಲ್‌ಮೆಂಟ್ ಪ್ರದೇಶದ ನಿವಾಸಿ ವಿಶಾಲಕುಮಾರ್ ಪರಶುರಾಮ ಗೋಕಾವಿ (21) ಎಂಬ ಯುವಕ ದೂರು ನೀಡಿದ್ದು, ನನಗೆ ನ್ಯಾಯ ದೊರಕಿಸಿಕೊಡುವಂತೆ ಮನವಿ ಮಾಡಿಕೊಂಡಿದ್ದಾರೆ.
ಪ್ರಕರಣದ ಹಿನ್ನೆಲೆ:
ವಿಶಾಲಕುಮಾರ್ ಕಳೆದ ಮೂರು ವರ್ಷಗಳಿಂದ ಕುರಹಟ್ಟಿ ಪೇಟೆಯ ತಹಸೀನ್ ಹೊಸಮನಿ ಎಂಬ ಯುವತಿಯೊಂದಿಗೆ ಪ್ರೇಮ ಸಂಬಂಧದಲ್ಲಿದ್ದರು.
ಬೇರೆ ಧರ್ಮದ ಯುವತಿಯನ್ನು ತಮ್ಮ ಪೋಷಕರು ಒಪ್ಪುವುದಿಲ್ಲ ಎಂಬ ಕಾರಣಕ್ಕೆ ವಿಶಾಲಕುಮಾರ್ ಈ ವಿಷಯವನ್ನು ಮನೆಯಲ್ಲಿ ಹೇಳಿರಲಿಲ್ಲ. ಆದರೆ, ತಹಸೀನ್ ತಮ್ಮ ತಾಯಿ ಬೇಗಂ ಬಾನು ಅವರಿಗೆ ತಮ್ಮ ಪ್ರೀತಿಯ ಬಗ್ಗೆ ತಿಳಿಸಿದ್ದರು.
ರಿಜಿಸ್ಟರ್ ಮತ್ತು ಧಾರ್ಮಿಕ ವಿವಾಹಗಳು:
2024ರ ನವೆಂಬರ್ 26ರಂದು ವಿಶಾಲಕುಮಾರ್ ಮತ್ತು ತಹಸೀನ್ ರಿಜಿಸ್ಟರ್ ಮ್ಯಾರೇಜ್ ಮಾಡಿಕೊಂಡಿದ್ದರು. ವಿಷಯ ತಿಳಿದ ನಂತರ, ತಹಸೀನ್ ಮತ್ತು ಬೇಗಂ ಬಾನು ಅವರು ಮುಸ್ಲಿಂ ಸಂಪ್ರದಾಯದಂತೆ ಮದುವೆಯಾಗುವಂತೆ ವಿಶಾಲಕುಮಾರ್‌ಗೆ ಒತ್ತಾಯಿಸಿದರು ಎನ್ನಲಾಗಿದೆ.
ಸಾಮರಸ್ಯದಿಂದ ಇರಬೇಕೆಂಬ ಉದ್ದೇಶದಿಂದ ವಿಶಾಲಕುಮಾರ್ ಈ ಮದುವೆಗೆ ಒಪ್ಪಿಕೊಂಡರು. ಇದನ್ನೇ ಬಂಡವಾಳ ಮಾಡಿಕೊಂಡ ಬೇಗಂ ಬಾನು, ಮುಸ್ಲಿಂ ಧರ್ಮದ ಪ್ರಕಾರವೇ ಮದುವೆಯಾಗಬೇಕೆಂದು ಒತ್ತಾಯಿಸಿದರು ಎಂದು ವಿಶಾಲಕುಮಾರ್ ತಿಳಿಸಿದ್ದಾರೆ. ಬೇಗಂ ಬಾನು ಅವರ ಸಹೋದರ ಇಬ್ರಾಹಿಂ ಸಾಬ್ ದಾವಲ್ ಖಾನ್ ಈ ಮದುವೆಯನ್ನು ನೆರವೇರಿಸಿದ್ದಾರೆ.
ಮತಾಂತರದ ಆರೋಪ ಮತ್ತು ಹೆಸರು ಬದಲಾವಣೆ:
2025ರ ಏಪ್ರಿಲ್ 25ರಂದು ಮುಳಗುಂದ ನಾಕಾ ಬಳಿ ಇರುವ ಉಮರ್‌ಬೀನ್ ಕತ್ತಾಬ್ ಮಸೀದಿಯಲ್ಲಿ ಮುಸ್ಲಿಂ ಸಂಪ್ರದಾಯದಂತೆ ಮದುವೆ ನೆರವೇರಿತು. ಈ ವೇಳೆ ತನಗೆ ತಿಳಿಯದಂತೆ ತನ್ನ ಹೆಸರನ್ನು ಬದಲಾಯಿಸಲಾಗಿದೆ ಎಂದು ವಿಶಾಲಕುಮಾರ್ ಆರೋಪಿಸಿದ್ದಾರೆ.
ಅಲ್ಲದೆ, ಮದುವೆಗುವ ಪೂರ್ವದಿಂದಲೂ ತಹಸೀನ್ ಮತ್ತು ಅವರ ತಾಯಿ ಬೇಗಂ ಬಾನು ಜಮಾತ್‌ಗೆ ಹೋಗುವಂತೆ ಒತ್ತಾಯಿಸುತ್ತಿದ್ದರು ಮತ್ತು ಕೊರಮ ಸಮಾಜಕ್ಕೆ ಸೇರಿದ ನೀನು ಮುಸ್ಲಿಂ ಧರ್ಮವನ್ನು ಸ್ವೀಕರಿಸಬೇಕು ಎಂದು ಒತ್ತಾಯಿಸಿದ್ದರು ಎಂದು ವಿಶಾಲಕುಮಾರ್ ಹೇಳಿದ್ದಾರೆ.
ವಿಷಯ ಬಯಲು:
ಮುಸ್ಲಿಂ ಸಂಪ್ರದಾಯದಂತೆ ಮದುವೆಯಾಗಿದ್ದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಈ ವಿಷಯ ವಿಶಾಲಕುಮಾರ್ ಅವರ ಕುಟುಂಬದವರಿಗೂ ತಲುಪಿದೆ.
ವಿಶಾಲಕುಮಾರ್ ಅವರ ತಾಯಿ ಮಂಜುಳಾ ಗೋಕಾವಿ ಅವರು ಹಿಂದೂ ಸಂಪ್ರದಾಯದಂತೆಯೂ ಮದುವೆ ಮಾಡುವ ವಿಷಯವನ್ನು ಪ್ರಸ್ತಾಪಿಸಿದಾಗ, ತಹಸೀನ್ ಕುಟುಂಬವನ್ನು ಸಂಪರ್ಕಿಸಿ ಮದುವೆ ಪ್ರಸ್ತಾಪಿಸಲಾಗಿತ್ತು.
ಹಿಂದೂ ಸಂಪ್ರದಾಯದ ಮದುವೆ ನಿರಾಕರಣೆ:
ಕುಟುಂಬದ ಒಪ್ಪಿಗೆಯ ಮೇರೆಗೆ 2025ರ ಜೂನ್ 05ರಂದು ಗಾಂಧಿ ನಗರ ಸೆಟಲ್‌ಮೆಂಟ್ ಏರಿಯಾದಲ್ಲಿರುವ ವಿಶಾಲಕುಮಾರ್ ಅವರ ಮನೆಯ ಎದುರು ಹಿಂದೂ ಸಂಪ್ರದಾಯದಂತೆ ಮದುವೆ ನಿಗದಿಪಡಿಸಲಾಗಿತ್ತು. ಆರಂಭದಲ್ಲಿ ಮದುವೆಗೆ ಒಪ್ಪಿಗೆ ನೀಡಿದ್ದ ತಹಸೀನ್, ನಂತರದಲ್ಲಿ ಕುಟುಂಬ ಮತ್ತು ಮುಸ್ಲಿಂ ಮುಖಂಡರ ಒತ್ತಾಯಕ್ಕೆ ಮಣಿದು ನಿರಾಕರಿಸಿದ್ದಾರೆ ಎನ್ನಲಾಗಿದೆ. ಅಲ್ಲದೆ, ತಹಸೀನ್ ಕಳೆದ ಒಂದು ತಿಂಗಳಿಂದ ಸಂಪರ್ಕಕ್ಕೆ ಸಿಗುತ್ತಿಲ್ಲ ಎಂದು ವಿಶಾಲಕುಮಾರ್ ತಿಳಿಸಿದ್ದಾರೆ.
ಮತಾಂತರ ಸ್ಪಷ್ಟ
ಪ್ರೀತಿಗೆ ಮಣೆದು ನಾನು ಮುಸ್ಲಿಂ ಧರ್ಮದ ಸಂಪ್ರದಾಯದಂತೆ ಬೇಷರತ್ ಮದುವೆಯಾಗಿದ್ದೆ. ಆದರೆ ಹಿಂದೂ ಸಂಪ್ರದಾಯದಂತೆ ಮದುವೆಯಾಗುವ ನಮ್ಮ ಕುಟುಂಬದ ಪ್ರಸ್ತಾವನೆಯನ್ನು ಅವರು ನಿರಾಕರಿಸಿದ್ದಾರೆ. ನನ್ನನ್ನೇ ಮುಸ್ಲಿಂ ಧರ್ಮಕ್ಕೆ ಪರಿವರ್ತಿಸುವ ಉದ್ದೇಶ ತಹಸೀನ್ ಕುಟುಂಬಕ್ಕೆ ಇದೆ ಎಂಬುದು ಸ್ಪಷ್ಟವಾಗಿದೆ ಎಂದು ವಿಶಾಲಕುಮಾರ್ ಹೇಳಿದ್ದಾರೆ.
ಸಹೋದರಿಯ ನಿದರ್ಶನ:
ತಹಸೀನ್ ಅವರ ಸಹೋದರಿ ತೈಬಾ ಅವರು ವಿನಾಯಕ್ ಶಹಪೂರ್ ಎಂಬ ಹಿಂದೂ ಯುವಕನನ್ನೇ ಮದುವೆಯಾಗಿದ್ದು, ವಿನಾಯಕ್ ಅವರ ಹೆಸರು ಬದಲಾಗಿದೆ ಮತ್ತು ಹಿಂದೂ ಯುವಕನಿಗೆ ಹುಟ್ಟಿದ ಇಬ್ಬರು ಮಕ್ಕಳಿಗೂ ಮುಸ್ಲಿಂ ಹೆಸರು ಇಡಲಾಗಿದೆ ಎಂದು ವಿಶಾಲಕುಮಾರ್ ಗಮನ ಸೆಳೆದಿದ್ದಾರೆ. ಈ ಬೆಳವಣಿಗೆಗಳನ್ನು ನೋಡಿದಾಗ ತಹಸೀನ್ ಕುಟುಂಬ ಮತಾಂತರ ಮಾಡಿದ್ದಾರೆ ಎಂಬುದು ಸ್ಪಷ್ಟವಾಗಿದೆ ಎಂದು ಅವರು ವಾದಿಸಿದ್ದಾರೆ.
ನ್ಯಾಯಕ್ಕಾಗಿ ಮನವಿ
ಮದುವೆ ನೆಪದಲ್ಲಿ ಮತಾಂತರ ಮಾಡಿ ನನಗೆ ಮಾನಸಿಕ ಹಿಂಸೆಯನ್ನು ನೀಡಿದ್ದು, ನಾನು ತೀವ್ರವಾಗಿ ನೊಂದಿದ್ದೇನೆ. ಈ ಬಗ್ಗೆ ತನಿಖೆ ನಡೆಸಿ ನನಗೆ ನ್ಯಾಯ ಕೊಡಬೇಕೆಂದು ವಿಶಾಲಕುಮಾರ್ ಜುಲೈ 16ರಂದು ರಾತ್ರಿ ಗದಗ ಶಹರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.
