ಗದಗ: ಭಾರತೀಯ ಅಂಚೆ ಇಲಾಖೆಯ ಆದೇಶದಂತೆ, ಜೂನ್ 21 ರಂದು (ಶನಿವಾರ) ಗದಗ ಪ್ರಧಾನ ಅಂಚೆ ಕಚೇರಿ ವ್ಯಾಪ್ತಿಗೆ ಬರುವ ಎಲ್ಲಾ ಉಪ ಅಂಚೆ ಕಚೇರಿಗಳು ಮತ್ತು ಶಾಖಾ ಅಂಚೆ ಕಚೇರಿಗಳಲ್ಲಿ ಹೊಸ ತಂತ್ರಾಂಶ (IT 2.0) ಅಳವಡಿಸಲಾಗುತ್ತಿದೆ.
ಈ ಹಿನ್ನೆಲೆಯಲ್ಲಿ ಅಂದು ಎಲ್ಲಾ ರೀತಿಯ ಅಂಚೆ ವ್ಯವಹಾರಗಳು ಮತ್ತು ವಹಿವಾಟುಗಳು ಸ್ಥಗಿತಗೊಳ್ಳಲಿವೆ ಎಂದು ಗದಗ ವಿಭಾಗೀಯ ಅಂಚೆ ಅಧೀಕ್ಷಕ ರಮೇಶ್ ಮಡಿವಾಳರ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಈ ತಂತ್ರಾಂಶ ಅಳವಡಿಕೆಯ ಕಾರಣದಿಂದಾಗಿ, ಅಂಚೆ ಕಚೇರಿಗಳ ಕಾರ್ಯನಿರ್ವಹಣೆಯಲ್ಲಿ ತಾತ್ಕಾಲಿಕ ಅಡಚಣೆಯಾಗಲಿದೆ. ಗದಗ ವಿಭಾಗೀಯ ಅಂಚೆ ವ್ಯಾಪ್ತಿಗೆ ಬರುವ ಮುಂಡರಗಿ, ರೋಣ, ನರಗುಂದ, ಶಿರಹಟ್ಟಿ, ಡಂಬಳ, ಬೆಳಹಟ್ಟಿ, ಮುಳಗುಂದ, ಲಕ್ಕುಂಡಿ, ಬೆಳವಣಕಿ, ಲಕ್ಷ್ಮೇಶ್ವರ, ಗದಗ ನಗರ, ಗಜೇಂದ್ರಗಡ, ಬೆಟಗೇರಿ ಸೇರಿದಂತೆ ಎಲ್ಲಾ ಉಪ ಅಂಚೆ ಕಚೇರಿಗಳು ಹಾಗೂ ಶಾಖಾ ಅಂಚೆ ಕಚೇರಿಗಳಲ್ಲಿ ಜೂನ್ 21 ರಂದು ಯಾವುದೇ ರೀತಿಯ ವಹಿವಾಟು ಇರುವುದಿಲ್ಲ.
ಅಂಚೆ ಗ್ರಾಹಕರ ಗಮನಕ್ಕೆ: ಐ.ಟಿ. 2.0 ತಂತ್ರಾಂಶ ಅಳವಡಿಕೆಯು ಅಂಚೆ ಸೇವೆಗಳನ್ನು ಇನ್ನಷ್ಟು ಸುಧಾರಿಸುವ ಮತ್ತು ಆಧುನೀಕರಿಸುವ ಉದ್ದೇಶದಿಂದ ಮಾಡಲಾಗುತ್ತಿದೆ. ಅಂಚೆ ಕಚೇರಿ ಗ್ರಾಹಕರು ಈ ಸಹಕಾರ ನೀಡಬೇಕು ಎಂದು ಅಧೀಕ್ಷಕ ರಮೇಶ್ ಮಡಿವಾಳರ್ ಕೋರಿದ್ದಾರೆ. ಸಾರ್ವಜನಿಕರು ಈ ದಿನಾಂಕವನ್ನು ಗಮನಿಸಿ ತಮ್ಮ ಅಂಚೆ ವ್ಯವಹಾರಗಳನ್ನು ಮುಂಚಿತವಾಗಿ ಪೂರೈಸಿಕೊಳ್ಳುವಂತೆ ಸೂಚಿಸಲಾಗಿದೆ.
