ಕೊಪ್ಪಳ: ತಾಲೂಕಿನ ತುಂಗಭದ್ರಾ ಹಿನ್ನೀರಿನಂಚಿನ ಗ್ರಾಮಗಳಾದ ಕಾಸನಕಂಡಿ, ಚಿಕ್ಕಬಗನಾಳ ಹಾಗೂ ಕರ್ಕಿಹಳ್ಳಿ ಇದೀಗ ಭಯದ ವಾತಾವರಣದಲ್ಲಿವೆ. ಮುಸ್ಸಂಜೆಯ ಮರೆಯಲ್ಲೇ ಕೃಷಿ ಭೂಮಿಗೆ ಇಳಿಯುವ ಚಿರತೆ ಮತ್ತು ಕರಡಿಗಳ ಹಾವಳಿಯಿಂದಾಗಿ ರೈತರು ಹೈರಾಣಾಗಿದ್ದಾರೆ.
ಕಳೆದ 15 ದಿನಗಳಿಂದ ತಮ್ಮ ಬೆಳೆಗಳನ್ನು ಕಾಪಾಡಿಕೊಳ್ಳಲು ಹಗಲಿರುಳು ಎನ್ನದೆ ಪಂಜುಗಳನ್ನು ಹಿಡಿದು ಗಸ್ತು ತಿರುಗುವ ದುಸ್ಥಿತಿ ಈ ಭಾಗದ ಅನ್ನದಾತರಿಗೆ ಬಂದೊದಗಿದೆ.
ಹುಬ್ಬಳ್ಳಿ-ಬಳ್ಳಾರಿ ರಾಷ್ಟ್ರೀಯ ಹೆದ್ದಾರಿಯ ಪಕ್ಕದಲ್ಲಿರುವ ಕಿರ್ಲೋಸ್ಕರ್ ಕಾರ್ಖಾನೆ ಎದುರಿನ ಕಾಸನಕಂಡಿ ರಕ್ಷಿತ ಅರಣ್ಯವು ವನ್ಯಜೀವಿಗಳ ಆವಾಸಸ್ಥಾನ. ಈ ಅರಣ್ಯದ ಪಕ್ಕದಲ್ಲೇ ಹರಿಯುವ ತುಂಗಭದ್ರಾ ನದಿಯ ದ್ವೀಪವಾದ ವಿಜಯಾದ್ರಿಗೆ ರಾತ್ರಿ ವೇಳೆ ನೀರು ಕುಡಿಯಲು ಬರುವ ಚಿರತೆ ಮತ್ತು ಕರಡಿಗಳು ಈಗ ನೇರವಾಗಿ ಗ್ರಾಮಗಳತ್ತ ಮುಖ ಮಾಡುತ್ತಿರುವುದು ರೈತರನ್ನು ಆತಂಕಕ್ಕೆ ದೂಡಿದೆ.
ಈ ಮೂರೂ ಗ್ರಾಮಗಳು ಅರಣ್ಯದ ಸಮೀಪದಲ್ಲೇ ಇರುವುದರಿಂದ ವನ್ಯಜೀವಿಗಳು ತಮ್ಮ ಗ್ರಾಮಗಳಿಗೂ ನುಗ್ಗುತ್ತಿವೆ ಎಂಬುದು ಗ್ರಾಮಸ್ಥರ ಬಲವಾದ ನಂಬಿಕೆ.
ಇತ್ತೀಚೆಗೆ ಮೊಬೈಲ್ ಕ್ಯಾಮೆರಾದಲ್ಲಿ ಸೆರೆಯಾದ ಅಸ್ಪಷ್ಟ ದೃಶ್ಯವೊಂದು ಈ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದೆ. ಓಡಿಹೋಗುತ್ತಿರುವ ಆ ಪ್ರಾಣಿ ಚಿರತೆಯೇ ಎಂದು ಗ್ರಾಮಸ್ಥರು ಹೇಳುತ್ತಿದ್ದಾರೆ.
ತುಂಗಭದ್ರಾ ಹಿನ್ನೀರಿನಲ್ಲಿ ನೀರಿನ ಮಟ್ಟ ಕಡಿಮೆಯಾಗುತ್ತಿದ್ದಂತೆ, ರೈತರು ಬೆಳೆದ ಎತ್ತರದ ಮೆಕ್ಕೆಜೋಳದ ಗದ್ದೆಗಳು ಈ ಪ್ರಾಣಿಗಳಿಗೆ ಅಡಗಿಕೊಳ್ಳಲು ಹೇಳಿ ಮಾಡಿಸಿದ ತಾಣಗಳಾಗಿವೆ.
ರಾತ್ರಿ ವೇಳೆ ವಿದ್ಯುತ್ ಪಂಪ್‌ಗಳನ್ನು ಚಾಲೂ ಮಾಡಿ ಹೊಲಗಳಿಗೆ ನೀರು ಹಾಯಿಸಲು ತೆರಳುವ ರೈತರು, ಮೆಕ್ಕೆಜೋಳದ ನಡುವೆ ಅಡಗಿರುವ ಚಿರತೆ ಅಥವಾ ಕರಡಿಯನ್ನು ಗುರುತಿಸುವುದು ದುಸ್ತರವೆಂದು ಅಳಲು ತೋಡಿಕೊಳ್ಳುತ್ತಿದ್ದಾರೆ.
ಹೀಗಾಗಿ, ತಮ್ಮ ಜೀವ ಮತ್ತು ಬೆಳೆಗಳನ್ನು ರಕ್ಷಿಸಿಕೊಳ್ಳಲು ರೈತರು ಗುಂಪುಗಳಾಗಿ ಸರದಿ ಪ್ರಕಾರ ರಾತ್ರಿ ಪೂರ್ತಿ ಪಂಜು ಹಿಡಿದು ಕಾವಲು ಕಾಯುತ್ತಿದ್ದಾರೆ.
ಕಾಸನಕಂಡಿ ಅರಣ್ಯದಲ್ಲಿ ಎರಡು ಚಿರತೆಗಳಿದ್ದ ಬಗ್ಗೆ ಮಾಹಿತಿ ಇದ್ದು, ಈ ಹಿಂದೆ ಒಂದು ಚಿರತೆ ಅರಣ್ಯ ಇಲಾಖೆಯ ಬೋನಿಗೆ ಬಿದ್ದಿದೆ. ಆದರೆ, ಇನ್ನೊಂದು ಚಿರತೆ ಇನ್ನೂ ಅರಣ್ಯದಲ್ಲಿದ್ದು, ಇದೀಗ ಗ್ರಾಮಗಳ ಸಮೀಪ ಸುಳಿದಾಡುತ್ತಿರಬಹುದೆಂಬ ಭಯ ಗ್ರಾಮಸ್ಥರಲ್ಲಿದೆ.
ಒಟ್ಟಾರೆಯಾಗಿ, ಕಾಡುಪ್ರಾಣಿಗಳ ಭಯದಿಂದ ಕಂಗಾಲಾಗಿರುವ ರೈತರು ತಮ್ಮದೇ ಆದ ರೀತಿಯಲ್ಲಿ ರಕ್ಷಣೆ ಪಡೆಯಲು ಪಂಜುಗಳ ಮೊರೆ ಹೋಗಿರುವುದು ಈ ಭಾಗದ ವಾಸ್ತವ ಚಿತ್ರಣವಾಗಿದೆ. ಸಂಬಂಧಪಟ್ಟ ಅಧಿಕಾರಿಗಳು ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿ ರೈತರ ಆತಂಕಕ್ಕೆ ಸೂಕ್ತ ಪರಿಹಾರ ಒದಗಿಸಬೇಕಿದೆ.
