ಬೆಂಗಳೂರು: ರಾಮನಗರ ಎಸ್ಪಿ ಸಂತೋಷ ಬಾಬು ಸಹಿತ ಒಟ್ಟು 13 ಐಪಿಎಸ್ ಅಧಿಕಾರಿಗಳನ್ನು ವರ್ಗಾವಣೆ ಮಾಡಿ ರಾಜ್ಯ ಸರಕಾರ ಆದೇಶ ಹೊರಡಿಸಿದೆ.
ಸೋಮವಾರ ಸರಕಾರ ಈ ಕುರಿತು ಅಧಿಕೃತ ಆದೇಶ ಹೊರಡಿಸಿದ್ದು, ರಾಮನಗರ ಎಸ್ಪಿ ಸಂತೋಷ ಬಾಬು ಅವರನ್ನು ಗುಪ್ತಚರ ಇಲಾಖೆಗೆ ವರ್ಗಾವಣೆ ಮಾಡಿದೆ. ಅದೇ ರೀತಿ ಬೆಂಗಳೂರು ವೈರ್ ಲೆಸ್ ಇಲಾಖೆ ಎಸ್ಪಿಯಾಗಿದ್ದ ಕಾರ್ತಿಕ ರೆಡ್ಡಿ ಅವರನ್ನು ರಾಮನಗರ ಎಸ್ಪಿಯಾಗಿ ವರ್ಗಾವಣೆಗೊಳಿಸಲಾಗಿದೆ.
ಇನ್ನು ಬೆಂಗಳೂರು ಡಿಸಿಪಿ ಪಾಟೀಲ ವಿನಾಯಕ ವಸಂತರಾವ್ ಅವರನ್ನು ಎಐಜಿಪಿಯಾಗಿ ವರ್ಗಾವಣೆಗೊಳಿಸಲಾಗಿದೆ. ಸ್ಥಳ ನಿರೀಕ್ಷೆಯಲ್ಲಿದ್ದ ಡಿ. ದೇವರಾಜು ಅವರನ್ನು ಬೆಂಗಳೂರು ನಗರ ಡಿಸಿಪಿ, ಡಿ.ಆರ್. ಸಿರಿಗೌರಿ ಅವರನ್ನು ಆಂತರಿಕ ಭದ್ರತೆ ವಿಭಾಗಕ್ಕೆ ವರ್ಗಾವಣೆ ಮಾಡಲಾಗಿದೆ.
ಚಾಮರಾಜನಗರ ಎಸ್ಪಿ ಟಿ.ಪಿ. ಶಿವಕುಮಾರ ಅವರನ್ನು ಕರ್ನಾಟಕ ಪವರ್ ಟ್ರಾನ್ಸಿಮಿಷನ್ ಕಾರ್ಪೋರೇಷನ್ ಲಿಮಿಟೆಡ್, ಪೊಲೀಸ್ ತರಬೇತಿ ಶಾಲೆಯ ಶೇಖರ ಎಚ್ .ಟಿ ಅವರನ್ನು ಬೆಳಗಾವಿ ನಗರ ಡಿಸಿಪಿ, ಪದ್ಮಿನಿ ಸಾಹೋ ಅವರನ್ನು ಚಾಮರಾಜನಗರ ಎಸ್ಪಿಯಾಗಿ ವರ್ಗಾವಣೆಗೊಳಿಸಲಾಗಿದೆ.
ಸ್ಥಳ ನಿರೀಕ್ಷೆಯಲ್ಲಿದ್ದ ಪ್ರದೀಪ ಗುಂಟಿ ಅವರನ್ನು ಕಾರಾಗೃಹ ಇಲಾಖೆ, ಮೈಸೂರು ಡಿಸಿಪಿ ಗೀತಾ ಎಂ.ಎಸ್. ಅವರನ್ನು ಮೈಸೂರು ತರಬೇತಿ ಶಾಲೆಗೆ, ಬೆಂಗಳೂರು ಸೆಂಟ್ರಲ್ ಡಿಸಿಪಿ ಕೆ. ರಾಮರಾಜನ್ ಅವರನ್ನು ಕೊಡಗು ಎಸ್ಪಿಯಾಗಿ, ಬೆಳಗಾವಿ ಡಿಸಿಪಿ ರವೀಂದ್ರ ಗಡಾದಿ ಅವರನ್ನು ಬೆಂಗಳೂರು ಸೆಂಟ್ರಲ್ ಡಿಸಿಪಿ ಹಾಗೂ ಕೊಡಗು ಎಸ್ಪಿ ಅಯ್ಯಪ್ಪ ಎಂ.ಎ. ಅವರನ್ನು ಗುಪ್ತಚರ ಇಲಾಖೆಗೆ ವರ್ಗಾವಣೆಗೊಳಿಸಲಾಗಿದೆ.
