ನವದೆಹಲಿ: ಭಾರತೀಯರಿಗೆ ಚಲನಚಿತ್ರ ಎನ್ನುವುದು ಮನರಂಜನೆಯ ಪ್ರಮುಖ ಮಾಧ್ಯಮ. ಮನರಂಜನೆಯನ್ನೆ ಕೇಂದ್ರಿಕರಿಸಿ ಪ್ರಾದೇಶಿಕ ಭಾಷೆಗಳಲ್ಲಿ ವರ್ಷಕ್ಕೂ ನೂರಾರು ಚಲನಚಿತ್ರಗಳು ಬಿಡುಗಡೆಯಾಗುತ್ತವೆ. ಅಂಥ ಸಿನಿಮಾಗಳ ಮಧ್ಯೆಯೂ ಈ ಮೂರು ಚಲನಚಿತ್ರಗಳು ಉದ್ಯಮಿಗಳಿಗೆ, ಕೈಗಾರಿಕೋದ್ಯಮಿಗಳಿಗೆ ಪ್ರೇರಣೆ ಮತ್ತು ಮಾರ್ಗದರ್ಶನ ನೀಡುತ್ತಿವೆ.
ಇಲ್ಲಿ ಉಲ್ಲೇಖಿಸಿರುವ ಮೂರು ಚಲನಚಿತ್ರಗಳು ಹಾಲಿವುಡ್ ಚಿತ್ರಗಳು. ಅದರಲ್ಲಿ ಮೊದಲನೆಯದ್ದು ಜಾಯ್ (Joy). ನೈಜ ಘಟನೆ ಆಧಾರಿತ ಈ ಚಿತ್ರ ಜಾಯ್ ಮಗ್ಗಾನೋ ಜೀವನ ಆಧರಿಸಿದೆ.
ಜಾಯ್ ಪಾತ್ರದಲ್ಲಿ ಜೆನ್ನಿಫರ್ ಲಾರೆನ್ಸ್ ಅಭಿನಯಿಸಿದ್ದಾರೆ. ಗಂಡನಿಲ್ಲದ ಒಂದು ಮಗುವಿನ ತಾಯಿ, ಹೊಸ ರೀತಿಯ ಕಸಬರಿಗೆ (mop) ಸಂಶೋಧಕಿ ಮತ್ತು ಉದ್ಯಮಿಯಾಗಿ ಯಶಸ್ವಿಯಾದ ಕಥೆಯನ್ನು ಹೊಂದಿದೆ.
ಜಾಯ್ ಕಂಡುಹಿಡಿದ ಕಸಬರಿಗೆ ಸ್ವಚ್ಛತೆ ನಿರ್ವಹಣೆಯಲ್ಲಿ ಬಹುದೊಡ್ಡ ಕ್ರಾಂತಿ ಮಾಡಿದೆ. ವೈಯಕ್ತಿಕ ಬದುಕಿನಿಂದ ಉದ್ಯಮಿಯಾಗುವ ವರೆಗಿನ ಪಯಣ ಮತ್ತು ಸಂಘರ್ಷ-ಸವಾಲುಗಳ ಮೇಲೆ ಬೆಳಕು ಚೆಲ್ಲುತ್ತದೆ.
ಇನ್ನು ಎರಡನೆ ಚಿತ್ರ ದಿ ಕಂಪನಿ ಮೆನ್ (The company men) . ಈ ಚಿತ್ರದಲ್ಲಿ ಬೆನ್ ಅಫೆಲೆಕ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಒಂದು ಕಾರ್ಪೋರೇಟ್ ಕಂಪನಿ ಉದ್ಯೋಗಿಗಳ ಕಡಿತದ ಸಂದರ್ಭದಲ್ಲಿ ಮೂವರು ಉದ್ಯೋಗ ಉಳಿಸಿಕೊಳ್ಳುವ ನಡೆಸುವ ಪ್ರಯತ್ನವನ್ನು ಬಿಂಬಿಸಲಾಗಿದೆ.
ಒಟ್ಟಾರೆ ಒಂದು ವರ್ಷದ ಅವಧಿಯನ್ನು ಕೇಂದ್ರಿಕರಿಸಿದೆ. ಆ ಅವಧಿಯ ಕೌಟುಂಬಿಕ ಸನ್ನಿವೇಶಗಳು, ಸಮುದಾಯದ ಜೊತೆಗಿನ ತಾಕಲಾಟ ಸಹಿತ ಹಲವಾರು ಅಂಶಗಳನ್ನು ಕಟ್ಟಿಕೊಡುತ್ತದೆ. ಉದ್ಯೋಗ ಕಳೆದುಕೊಂಡು ಹೊಸ ಕೆಲಸ ಆರಂಭಿಸುವ ಸವಾಲುಗಳನ್ನು ದಾಖಲಿಸಿದೆ.
ಇನ್ನು ಮೂರನೆ ಚಿತ್ರ ಥ್ಯಾಂಕ್ಯು ಫಾರ್ ಸ್ಮೋಕಿಂಗ್ (Thank you for smoking). ಇದೊಂದು ವಿಡಂಬನಾತ್ಮಕ ಹಾಸ್ಯ ಚಿತ್ರ. ಅರೋನ್ ಇಕಹಾರ್ಟ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.
12 ವರ್ಷದ ಮಗನಿಗೆ ತಂದೆಯೊಬ್ಬ ಮಾದರಿಯಾಗುವ ಕಾಲದಲ್ಲಿ ಸಿಗರೇಟ್ ದಾಸನಾಗಿ ಬದಲಾಗುವ ಕಥೆ ಹೊಂದಿದೆ. ಈ ಮೂರು ಚಿತ್ರಗಳು ಬದುಕಿನಲ್ಲಿ ಭರವಸೆ, ಮನವೊಲಿಸುವ ಕಲೆ ಮತ್ತು ಧೈರ್ಯ ನೀಡುತ್ತದೆ. ಉದ್ಯಮಿಗಳಾಗಬೇಕು ಎಂದು ಬಯಸುವವರು ಮತ್ತು ಉದ್ಯಮಿಗಳು ಬಿಡುವಾದಾಗ ಈ ಚಿತ್ರಗಳನ್ನು ನೋಡಬಹುದು.
