ತುಮಕೂರು: ಡಿಸೆಂಬರ್ ವರೆಗೆ ಕೆಲಸ ಮಾಡುವಂತೆ 108 ಸಿಬ್ಬಂದಿಗಳ ಮನವೊಲಿಸಲಾಗುವುದು. ಡಿಸೆಂಬರ್ ನಂತರ ಹೊಸ ಸಂಸ್ಥೆ ಬರುತ್ತದೆ. ಆಗ ಯಾವುದೇ ಸಮಸ್ಯೆ ಎದುರಾಗುವುದಿಲ್ಲ ಎಂದು ಆರೋಗ್ಯ ಸಚಿವ ಸುಧಾಕರ್ ಹೇಳಿದರು.
ತುಮಕೂರಿನಲ್ಲಿ 108 ಸಿಬ್ಬಂದಿಗಳ ಪ್ರತಿಭಟನೆ ಕುರಿತು ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, 108 ಸಿಬ್ಬಂದಿಗೆ ವೇತನ ಬಾಕಿ ಕೊಡಿಸುವುದು ಸೇರಿದಂತೆ ಯಾವುದೇ ತೊಂದರೆ ಆಗದಂತೆ ನೋಡಿಕೊಳ್ಳುತ್ತೆವೆ. ಅದು ಸರಕಾರದ ಜವಾಬ್ದಾರಿಯೂ ಹೌದು. ಮಾತುಕತೆ ಮೂಲಕ ಸಮಸ್ಯೆ ಪರಿಹಾರ ಮಾಡಲಾಗುವುದು ಎಂದು ತಿಳಿಸಿದರು.
ಡಿಸೆಂಬರ್ ನಂತರ ಜಿವಿಕೆ ಸಂಸ್ಥೆಗೆ ಯಾವುದೇ ಕಾರಣಕ್ಕೂ 108 ಸೇವೆ ನಡೆಸಲು ಅವಕಾಶ ಮಾಡಿಕೊಡಲ್ಲ. ಈಗಾಗಲೇ ಅವರು ಸರಕಾರಕ್ಕೆ ಮತ್ತು ಜನರಿಗೆ ಯಾವ ರೀತಿ ಸಮಸ್ಯೆ ತಂದೊಡ್ಡಿದ್ದಾರೆ ಎನ್ನುವುದು ಗೊತ್ತಾಗಿದೆ. ಜಿವಿಕೆ ಸಂಸ್ಥೆಯ ಸೇವೆಯಲ್ಲಿ ಸಾಕಷ್ಟು ಸಮಸ್ಯೆ ಇರುವುದು ಬಹಿರಂಗವಾಗಿದೆ ಎಂದು ತಿಳಿಸಿದರು.
ಈಚೆಗಷ್ಟೆ ನಡೆದ ಗರ್ಭಿಣಿ ಮತ್ತು ಅವಳಿ ಶಿಶುಗಳ ಸಾವಿನ ಕುರಿತಾಗಿ ಪ್ರತಿಕ್ರಿಯಿಸಿದ ಸಚಿವರು, ಪ್ರಕರಣದಲ್ಲಿ ಏಕಮುಖ ತನಿಖೆ ನಡೆದಿಲ್ಲ. ಸಿಸಿ ಟಿವಿ ದೃಶ್ಯಾವಳಿ ನೋಡಿದ್ದೆನೆ. ಕಮಿಷನರ್ ಹಂತದಲ್ಲಿ ತನಿಖೆ ನಡೆಯುತ್ತಿದೆ. ವರದಿ ಬಂದ ನಂತರ ಮುಂದಿನ ತೀರ್ಮಾನ ಕೈಗೊಳ್ಳಲಾಗುತ್ತದೆ. ಅಲ್ಲಿಯವರೆಗೆ ಅಮಾನತ್ತಿಲ್ಲಿರುತ್ತಾರೆ. ತಪ್ಪು ಮಾಡಿಲ್ಲ ಎಂದಾದರೆ ತಕ್ಷಣ ಸೇವೆಗೆ ನಿಯೋಜಿಸಲಾಗುವುದು ಎಂದರು.
